Kanha

Us anjaane dhun ki aahat,

Pairon ke thirakne ki chaahat,

Man ke jasbaaton ki sharaarat,

Nazron ki jhuki si vo nazakat.

Pal bhar main taal se taal mile,

Nainon main bas teri chavi khile,

Koyle sa tan aur vastre peele

Teri murali par saara sansaar hile.

Aaj har gopi teri radha hai,

Rooh ke samarpan ka waada hai,

Bas tujhse dil ko baandha hai,

Main adhoori aur tu mera aadha hai.

Mor-mukut ka pankh hoon main,

Chori ke maakhan ka swaad hoon main,

Gopiyon ka niswarth prem hoon main,

Tere raasleela ka nritya hoon main.

Aaj duniya ka mujhe hosh nahi,

Sab jhoom rahe, koi khamosh nahi

Par mujhe sirf tu dikhe yeh mera dosh nahi

Teri raasleela sirf mere liye hai,

Fir chaahe yeh kehna mera moh sahi.  

P.s: This poem is symbolic of what dance means to me. My choreography always involves elements from Krshna's life and while performing I feel in one with him- As Radha was to Krishna!

Pehli Yaadein

Kya yaad hai tumhe vo pehli mulakaat?

Hamare beech kuch 20 seediyon ka faasla tha,

Aur July ki thi vo pehli barsaat

Na jaane peeche mudkar kyun dekha maine,

Tum bhi muskuraakar mujhe hi dekh rahe the

Shayad mere chaate par nazar daal rahe the.

Us do pal ke khamosh alfaaz

Zindagi ban jayege, yeh na socha tha.

Fir kabhi yehi yaad mere dil ko tatolte

Kuch pal ke aansoon de jayenge, yeh na socha tha.

Aaj firse mudkar dekhne ka man hai,

Usi barish main bheegne ka man hai

Tum wahi khade rehna muskuraate hue.

Kyunki aaj ek baar fir vo pal jeene ka man hai. 

Kya yaad hai tumhe vo pehli baar haath pakadna?

Gaalon ka sharmaana, hoton ka umadte jasbaat dabaana

kuch pal tanha guzarne ki chaah main dil ka tadapna.

Tumne chimti kaati thi mujhe zor ki,

Gusse main haath hataya tha maine.

Pyaar se mere haathon ko choomkar

Apne haathon ke beech chupa liya tha tumne.

Tumhara pyaar se satana,

Zindagi ban jayegi, yeh na socha tha

Fir yehi pyaar dil ko satate hue dard ban kar

kuch pal ke ansoon de jayegi, yeh na socha tha.

Aaj fir dil ko tadpaane ka man hai,

Bematlab ki baton par naraaz hone ka man hai,

Tum mera haath apne hathon ke beech chupa lena

Kyunki aaj ek baar fir vo pal jeene ka man hai.

Kya yaad hai tumhe humari vo pehli takraar?

Ek hafte tak roz tumhara number milakar kaat deti thi

Aur Raat ko takiye se apna saara gum baant leti thi.

Aakhir jab 7 din baad darwaaze par tumhe dekha

Toh yeh bhi bhool gayi ki kis baat par naraaz hui thi,

Pal bhar main sulah bhi ho gayi aur pyaar bhari baatein bhi ki,

Ek doosre ke ankahi baton ko samajhne ki

anginat kasmain vaadein bhi ki.

Tumse yun kasmon se jud jaana

Zindagi ban jayegi, yeh na socha tha

Fir yehi toote kasmain mere dil ko chubakar,

Kuch pal ke aansun de jayenge, yeh na socha tha.

Aaj fir tumse roothne ka man hai,

Door rehkar tumhe meri yaad dilaane ka man hai

Par is baar tumhe mananne ka mauka nahi denge

Ab bas khudko jeena sikhaane ka man hai.

Kyunki aaj aakhri baar in palon ko yaad karne ka man hai!

PANNE

Ek kitab thi bahut hi pyaari,

Nayi si vo safed panno waali

Uspar ik daastan likne, maine

Kaali siyaahi ki sheeshi thi nikali.           

Kis pal ki galti thi vo kya pata,

Aaj bhi poochti hoon khudse hi

Laaparwaahi thi ya fir janboochkar

Maine panno par syaahi gira di.

Pehle panne par jo giri syaahi

Har panne ko seenchti chal gayi

Ab kone kone main kala dhabba hai

Aur kahaani toh shuru bhi nahi ki thi.

Syaahi ke saaye se kuch pal bachakar

Kaise sajaaoon unhe in panno par yoon

Yaadein bhi kaali pad gayi aur pal bhi

Shayad ab safed rang se kalam bhar loon.

Fir dhabbo se na jasbaat dabenge

Bun bhi loongi main kuch pal naye

Un rang- berang panno par aaj

Kya pata ek naya afsaana mil jaaye.